सुजित कुमार, वैभव गुप्ता व अमोद मालवीय या तीन तरुणांनी फ्लिपकार्टमधून बाहेर पडून सुरू केलेल्या ‘उडान’ या बिझनेस-टू-बिझनेस मार्केटप्लेस असलेल्या स्टार्टअपला ‘डीएसटी ग्लोबल’ आणि ‘लाईटस्पीड व्हेंचर पार्टनर्स’ या कंपन्यांकडून २२५ मिलियन अमेरिकी डॉलरचे फंडिंग मिळाले आहे. या फंडिंगमुळे फक्त २६ महिन्यात ‘उडान’चे बाजारमूल्य हे १ बिलीयन झाले आहे.
या आधी तयार अन्न घरपोच देणारे ‘स्विगी’, मोबाईल मेसेजिंग app ‘हाईक’ आणि ऑनलाईन जाहिरात प्लॅटफॉर्म ‘इनमोबी’ या स्टार्टअप्सना १ बिलियन बाजारमूल्य करण्यासाठी ४ वर्षांचा तर पेटीएमने सुरू केलेल्या ‘पेटीएम मॉल’ या स्टार्टअपचा चौदा महिने लागले होते.
ऍमेझॉन बिझनेस, अलिबाबा आणि वॉलमार्ट प्रमाणे उडान हेही उत्पादक आणि विक्रेते यांना जोडते. ‘उडान’ने ‘हाइव्हलूप टेक्नॉलॉजी प्रायव्हेट लिमिटेड’ या नावाने जून २०१६ मध्ये कंपनी नोंदवली होती व नोव्हेंबर २०१६ मध्ये त्यांचे प्रॉडक्ट प्रायोगिक तत्त्वावर बाजारात आले. जून २०१७ पासून ते पूर्णपणे बाजारात उतरले आहेत.